17 жніўня 2022 года ў Гарадской мастацкай галерэі твораў Л. Д. Шчамялёва адкрылася выстава жывапісу і графікі «Леанід Шчамялёў. Мой Мінск» з калекцыі «Прадмесце», прысвечаная 955-годдзю сталіцы нашай дзяржавы.

Леанід Дзмітрыевіч Шчамялёў нарадзіўся ў 1923 годзе ў Віцебску, але большую частку свайго жыцця (больш за 70 гадоў) пражыў у Мінску і па праве мог лічыць родным горадам. Горад, які сустрэў будучага майстра ў 1947 годзе руінамі і попелам, горад, які адбудоўваўся і рос на вачах мастака і з якім было звязана так шмат – вучоба ў Мінскім мастацкім вучылішчы і Беларускім тэатральна-мастацкім інстытуце, работа ў Рэспубліканскай школе-інтэрнаце па музыцы і выяўленчаму мастацтву ім. І. А. Ахрэмчыка (цяпер – гімназія-каледж мастацтваў імя І. А. Ахрэмчыка) і на архітэктурным факультэце Беларускага палітэхнічнага інстытута (цяпер БНТУ), майстэрні ў Доме мастакоў на вул. Сурганава.

Леанід Шчамялёў шмат сваіх работ прысвяціў любімаму Мінску, і горад заўсёды адказваў узаемнасцю і шчодра падаваў сюжэты для новых карцін. Нішто не выслізнула ад дапытлівага позірку майстра. Усё было важна і неабходна ў гарадскім жыцці – шырокія праспекты і ўтульныя дворыкі, акружаныя кустамі бэзу, вільготная прахалода восеньскіх паркаў і спакойнае люстэрка Мінскага мора, а таксама звычайныя гараджане, знаёмыя і не вельмі, іх будні і святы, гісторыя і сучаснасць.

Народны мастак Беларусі, лаўрэат Дзяржаўнай прэміі БССР, кавалер ордэна Францыска Скарыны, ветэран Вялікай Айчыннай вайны яшчэ пры жыцці стаў легендай Мінска. За цыкл работ «Палітра маёй гадзіны» яму прысвоена званне лаўрэата прэміі Саюзнай дзяржавы. А ў 2003 годзе майстар падарыў роднаму гораду 60 сваіх палотнаў і быў удастоены ганаровага звання «Мінчанін года». У тым жа годзе ў Мінску адкрылася Гарадская мастацкая галерэя твораў Л. Д. Шчамялёва. На выставе прадстаўлены работы з калекцыі галерэі «Прадмесце» і з фондаў Музея гісторыі горада Мінска.

Выстава працягнецца да 2 кастрычніка.

НІА
па матэрыялах БЕЛТА