З 6 па 11 лютага 2017 года ў Мінску пройдзе міжнародны фестываль экалагічнага кіно «Планетарый». На ім будуць прадстаўлены фільмы з Беларусі, Францыі, ЗША, Швейцарыі, Канады, Вялікабрытаніі, Нарвегіі, Іспаніі, Італіі. Акрамя кінапаказаў на фестывалі будуць арганізаваны пляцоўкі для дыскусій і абмеркаванняў.
«Кіно – гэта заўсёды нагода для дыскусій. З дапамогай экалагічнага кіно мы хочам пагаварыць на тэмы, звязаныя з абаронай навакольнага асяроддзя, – дзеляцца арганізатары кінафестывалю. — Для фестывалю мы адабралі тыя кінастужкі, якія паказваюць не толькі праблемы, але і іх рашэнні. У фільмах распавядаецца пра людзей і іх натхняльныя гісторыі. Ад такіх прыкладаў сапраўды хочацца дзейнічаць».
Адкрые фестываль кінастужка «Поры года» («Les Saisons») стваральнікаў знакамітых дакументальных фільмаў «Птушкі» і «Акіяны» Жака Перрэна і Жака Клюзо. У ёй распавядаецца пра прыгажосць еўрапейскіх лясоў, унікальную ролю Белавежскай пушчы як адзінага ацалелага старадаўняга ляснога масіву.
У праграму фестывалю ўключаны наступныя стужкі і мерапрыемствы:
- «Анёл Азуль» (рэж. Марсі Крават) – гэта не толькі фільм пра вядомага скульптара, але і спроба даведацца, што адбываецца на дне мора, чаму каралы знікаюць, як мы звязаны з морам і інш.;
- «Чалавек» (рэж. Ян Арцюс Бертран) – кінастужка, якая, магчыма, не адкажа на пытанне «Што робіць нас людзьмі?», але падштурхне да дыялогу на гэту тэму;
- публічная лекцыя «Як правесці экапрыязнае мерапрыемства» – проста, зразумела і з гісторыямі з уласнай практыкі эксперт Цэнтра экалагічных рашэнняў раскажа пра тое, як правесці экапрыязнае мерапрыемства на любую тэму і атрымаць ад гэтага задавальненне;
- «Экалагічнае кіно ў беларускім клімаце» – паказ кароткаметражных фільмаў ад беларускіх аўтараў і дыскусія;
- праграма кароткаметражных фільмаў – самыя цікавыя стужкі на тэму аховы навакольнага асяроддзя з усяго свету.
Уваход на ўсе фільмы/сустрэчы вольны. Праграмы дэманструюцца на мовах арыгіналу з рускімі субтытрамі.
Больш падрабязную інфармацыю пра мерапрыемствы можна паглядзець на старонках кінафестывалю ў сацыяльных сетках «ВКонтакте», Facebook.
НІА
